أهمية الاستثمار للخروج من أزمة ارتفاع الأسعار

ليه تستثمر فلوسك؟

حل مشكلة ارتفاع أسعار السلع الأساسية، اللي بيواجهها الناس في الفترة الأخيرة، بيتلخص في كلمة واحدة "الاستثمار"؛ لأن في خلال سنة واحدة قيمة أي مبلغ كاش بتقل، يعني لو معاك في شهر يناير 1000 جنيه في ديسمبر هتبقى قيمتها الشرائية بتساوي 813 جنيه، تقدر تشوف سعر أي حاجة كنت عايز تشتريها من 3 شهور مثلًا كان كام ودلوقتي بقى كام.

الاستثمار هو انك تستفيد من فلوسك، يعني تخلي قيمة فلوسك الشرائية تزيد أو على الأقل تحافظ على قيمتها. الاستثمار هو الحل عشان تزود دخلك الشهري، وتحمي نفسك من التضخم، وانك تعمل ثروة في يوم من الأيام؛ لأن مفيش ثروة بتيجي من الدخل الشهري.

امتى تستثمر فلوسك؟

الاستثمار ملوش وقت محدد، كل ما تبدأ بدري كل ما كان أحسن ليك كل ما هتكسب عائد بشكل أسرع، ولكن في الظروف الحالية لازم تبدأ في أسرع وقت لأن كل يوم انت بتتأخر فيه، انت بتخسر فلوس وفرص للاستثمار؛ لأن أسعار الأصول اللي ممكن تستثمر فيها بتزيد كل يوم عن اليوم اللي قبله. وخليك دايمًا فاكر ان الثروة هي نتيجة إعادة توجيهك لأرباح الاستثمار اللي بتقوم فيه في استثمار تاني.

إزاي تستثمر فلوسك؟

عشان تبدأ تستثمر فلوسك لازم تحدد شوية حاجات، أولها احتياجاتك والتزاماتك، ومنها تحدد القيمة اللي هتستثمرها، كالتالي:

• 50% للاحتياجات الأساسية 

• 30% للرغبات (مش أساسية)

• 20% للاستثمار 

ولازم تحدد الهدف من استثمارك هل هو الأمان ولا زيادة رأس المال ولا زيادة الدخل، وتحدد مدة الاستثمار يعني المدة اللي تستنى بعدها ربح من استثمارك، قصير المدى (من سنة لـ 3 سنين)، متوسط المدى (من 3 سنين لـ 10 سنين)، طويل المدى (من 10 سنين فأكثر)، وأهم حاجة لازم تحددها هو درجة تحملك للمخاطر.

تستثمر فلوسك فين؟

ويبقى السؤال الأخير هو: تستثمر فلوسك فين؟ طبعًا في أكثر من نوع للاستثمار، لكن اختيارك هيتوقف على درجة تحملك للمخاطر يعني الاستثمار في البورصة مربح ولكن فيه مخاطرة عالية جدًا زي ما ممكن في لحظة تكسب ثروة، ممكن في اللحظة اللي بعدها تخسر كل حاجة. اختيار الاستثمار الأكثر أمانًا في الحالة دي هيكون بين اتنين، العقارات والدهب. 

عائد الاستثمار في العقارات أكبر من عائد الاستثمار في الدهب، ولكن الاستثمار في العقارات بيحتاج ميزانية أكبر من الدهب، وعشان كدة يعتبر الاستثمار في الدهب أسهل؛ لأن أيًا كان المبلغ اللي معاك هتقدر تستثمره. وتقدر تستنج من ده ان لو المبلغ اللي قررت تستثمره كان كبير يبقى الأفضل تستثمره في العقارات ولو كان صغير تقدر تستثمره في الدهب، المهم انك متحافظش على فلوسك كاش؛ لأن قيمتها هتقل مع الوقت.